HOME Bo konsumo di awa i elektrisidat

BO KONSUMO DI AWA I ELEKTRISIDAT

Tur luna bo ta risibí na kas un kuenta di Aqualectra, ku spesifikashon di bo konsumo di awa i elektrisidat e luna en kuestion i loke bo mester paga.


Nos sistema di tarifa
Aqualectra ta distinguí entre tarifa doméstiko, komersial i industrial. Pa klientenan doméstiko ta apliká un sistema di tarifa progresivo. Ke men, mas haltu e konsumo di awa i elektrisidat ta, mas haltu e tarifa ta. E tarifa komersial ta pa klientenan ku konsumí elektrisidat i awa pa finnan komersial, manera pakus, fábrika i hotèl. E tarifanan komersial i industrial no ta progresivo. Tin un tarifa pa elektrisidat i un pa awa.

Nos tarifa ta konsistí di un parti fiho i un parti variabel. E parti variabel ta relatá na preis di petroli. Fluktuashon den preis di petroli ta kousa periódikamente kambio di tarifa, ku Servisio di Asuntunan Ekonómiko ta kontrolá.

Klek aki pa e tarifanan aktual.


Di kohementu di meter te bo kuenta
Pa por manda e kuenta, nos mester sa kuantu bo konsumo tabata den e luna en kuestion. Esei ke men ku en prinsipio mensualmente nos mester kue meter di awa i koriente di tur kliente. Nos a kontratá un kontratista pa e trabou akí. Nos ta purba molostiá bo lo ménos posibel ora ta kue meter. Si bo meternan ta den un nis na rant di bo parsela, posiblemente bo no ta ripará ki ora ta kue meter. Pero, si bo meternan no ta na rant di bo parsela, nos mester subi bo tereno, ku bo pèrmit, pa kue meter. Na tur momento e kohedó di meter por identifik'é ku un karnèt di identifikashon di Aqualectra
.
Tin biaha nos mester balotá bo konsumo
Por sosodé ku e kohedó di meter no por kue bo meter, por ehèmpel si bo meter(nan) ta den kas (esaki ta partikularmente e kaso ora ta trata di kasnan mas bieu) i bo no ta na kas. Den un kaso asina nos ta balotá bo konsumo di e luna ei, kalkulá a base di bo promedio di konsumo diario. Ta kalkulá e promedio akí basá riba konsumo real di den pasado na bo adrès. Mas abou riba bo kuenta ta aparesé na e spesifikashon, si a traha e kuenta basá riba konsumo real (C.U. = cummulative usage) òf basá riba konsumo balotá (E.U. = evaluated usage).
Asina ku, despues di un balotashon, kue e konsumo real, ta rekalkulá e konsumo balotá. Lo kompensá den bo siguiente kuenta eventual diferenshanan entre e konsumo balotá anteriormente i e konsumo real.

Nos ta yuda prevení problema
Ta mashá desagradabel pa un kliente haña un kuenta ku un konsumo mas haltu di loke el a spera. Pa detektá rápidamente eventual eror, nos ta kontrolá regularmente si bo konsumo ta desviá supstansialmente di bo konsumo promedio. Si esei ta e kaso nos por disidí di bolbe kue bo meter, pa koregí kualke eventual kibokashon. Nos por investigá tambe na bo kas o negoshi kiko por ta motibu di un konsumo ekstremadamente haltu di awa o elektrisidat. Por ehèmpel por sosodé ku bo tin un lekkage na bo kas o negoshi, pero ku bo no sa di dje. Nos kolaboradornan por mustra bo riba esaki i konsehá bo kiko hasi.
Despues ku kue meter, ta hinka e estadonan di meter den nos sistema di informashon di konsumidó. E sistema akí ta kalkulá outomátikamente, a base di e tarifanan vigente e suma ku bo mester paga pa bo konsumo di awa i elektrisidat. Un kompania ku ta repartí pòst ta entregá e kuentanan di bario pa bario.


Klek aki pa bo splikashon detayá di bo kuenta.


Posibilidatnan di pago
Bo por paga bo kuenta di Aqualectra na diferente manera:

  • Kèsh òf ku chèk na kaha di un di e ofisinanan di servisio di Aqualectra. Nos ta rekomendá bo bai ku bo kuenta ora bo ta bai paga.
  • Ku bo tarheta di banko (MCB, RBTT o Banco di Caribe) na kaha di un di e ofisinanan di servisio di Aqualectra.
  • Kèsh na bankonan lokal. Por paga kèsh tambe, sin ku bo tin kuenta na e banko en kuestion. Den e kaso ku bo ke paga kèsh na banko, bo ta obligá di bai ku bo kuenta di Aqualectra; despues di pago nan ta debolbé bo e parti di abou di bo kuenta.
  • Giral via banko, si bo tin kuenta na e banko. Den e kaso ei tin tres manera ku bo por paga:
    • Transferensia pa un solo biaha: bo ta duna bo banko enkargo pa paga. A reservá riba bo kuenta di Aqualectra un espasio pa yena bo number di kuenta di banko i pa bo firma. Dspues di pago nan ta debolbé bo e parti di abou di bo kuenta.
    • Transferensia outomátiko: bo por outorisá bo banko pa paga bo kuenta di Aqualectra tur luna. Asina bo no tin nodi di okupá bo mas ku pago di bo kuenta.
      Na Aqualectra tin formulario di outorisashon ku por yena pa RBTT o MCB, den kua bo ta outorisá bo banko pa paga bo kuenta. Nos ta pèrkurá e ora ei pa bo banko risibí e formulario. Aqualectra ta manda bo kuenta di Aqualectra na bo kas, si bo tin kuenta ku RBTT, MCB o Girobank. Den otro kaso (Banco di Caribe, SFT, RBTT i Orcobank) ta manda bo kuenta e banko en kuestion.
    • Ku bo tarheta di banko. Na algun banko ta posibel pa duna enkargo di pago ku bo tarheta di banko.
       
Informashon
Bo por drenta den kontakto ku nos ku tur bo preguntanan riba bo konsumo o bo kuenta durante ora di ofisina via telefòn number 463-2328 i 463-2329.
Entre otro por yama e numbernan akí si:
  • Bo ke sa ki dia ta kue bo meter; nos tin un skema anual riba kua ta pará riba ki dia di luna bo por spera un kolaboradó ku ta bin kue bo meter na kas o negoshi.
  • Bo ripará ku ya pa mas ku tres luna ta balotá bo kuenta, na lugá di kue e konsumo real. Den e kaso ei nos ta konsehá bo yama nos i bisa nos bo estado di meter.
  • Bo no a risibí bo kuenta.
  • Bo tin pregunta tokante bo uso o nos tarifanan.


Klek aki pa download e foyeto di  nos kuenta.