KONEKSHON/DESKONEKSHON DI AWA I ELEKTRISIDAT

Konekshon nobo
Ora kambia kas naturalmente ta importante pa bo por disponé lo mas pronto posibel di elektrisidat i awa. Si bo kas o parsela ainda no ta disponé di un konekshon di awa i un instalashon eléktriko, bo mester entregá un petishon pa un konekshon nobo.


Pidi un konekshon nobo
Un di e asuntunan ku bo mester regla na momento di konstrukshon di bo kas ta e konekshon di awa i elektrisidat. Den nos foyeto riba konekshon nobo nos ta amplia riba e pasonan ku mester sigui pa bo haña un konekshon nobo di awa i elektrisidat.
Promé ku bo por entregá un petishon serka nos pa un konekshon nobo di elektrisidat, bo mester pèrkurá pa un instaladó rekonosé pone bo instalashon eléktriko. Na nos ofisinanan di servisio por haña un lista di tur instaladó rekonosé na Kòrsou.
Pa petishon di un konekshon nobo, mester yena i firma un formulario di petishon di Aqualectra pa entrega di awa i elektrisidat. Por haña e formulario akí na tur ofisina di servisio di Aqualectra.
Den nos foyeto ta pará ki papel mas bo mester entregá i ki ora bo mester paga gastu di konekshon i e depósito i kiko Aqualectra ta hasi efektivamente pa realisá e konekshon.
Kòrda menshoná mashá kla riba e formulario di petishon unda por drenta den kontakto ku bo durante ora di ofisina (bo adrès, number di telefòn i, si ta aplikabel, bo number di selular). Asina por prevení retraso innesesario.

Pone un konekshon eksistente riba bo nòmber
Si bo kas nobo ya kaba tin un konekshon di awa i un instalashon eléktriko bo por entregá e petishon na Aqualectra pa un konekshon eksistente pa awa i koriente.
Aqualectra tin un foyeto apart pa petishon di un konekshon eksistente di awa i koriente, den kua ta pará ekstensamente loke un kliene mester hasi pa haña e konekshon riba su nòmber.
Si e konekshon di awa i koriente ainda ta riba nòmber di e habitante anterior, mester deskonektá e konekshon akí promé. Den e kaso akí nos ta rekomendá bo bini Aqualectra huntu ku e habitante anterior, pa por entregá e formulario di terminashon huntu ku bo formulario di petishon. Asina bo ta skapa hopi tempu, komo den e kaso ei no ta deskonektá en realidat e konekshon eksistente, sino ku ta pas'é direktamente na bo nòmber. E or'ei bo por kuminsá usa awa i elektrisidat umbé. E siguiente kuenta pa e adrès ei lo ta na bo nòmber.

Si a deskonektá e konekshon eksistente, en prinsipio ta hasi e konekshon na e ret di distribushon pa e kliente nobo denter di 5 dia di trabou despues di pago di e depósito. Den e kaso ei Aqualectra ta pone fius i meter di awa. Denter di 1 pa 2 luna e kliente nobo ta risibí promé kuenta na kas.

Aki tambe ta konta ku mester nota adrès i number di telefòn kla riba e formulario di petishon, pa Aqualectra sa kon por drenta den kontakto ku bo durante ora di ofisina, den kaso ku nos tin kualke pregunta o topa kualke problema.


Hasi bo instalashon mas pisá o kambia su lugá
Si bo ta deseá hasi bo instalashon eléktriko mas pisá, por ehèmpel, ora bo konstruí un parti nobo na bo kas òf ora bo ta deseá mas konekshon di 220 Volt, un instaladó rekonosé mester hasi bo instalashon mas pisá. Na bali di informashon di Aqualectra bo por haña un lista ku nòmber di tur instaladó rekonosé na Kòrsou. Despues bo mester sigui mésun prosedura ku den kaso di petishon pa un konekshon eléktriko nobo. Aqualectra ta manda bo un karta den kua ta pará kuantu bo mester bin paga (oumento di e suma di depósito i gastu relashoná ku e instalashon mas pisá).
Si bo ke kambia lugá di bo meter, por ehèmpel, mand'é un nis na rant di bo parsela, bo mester entregá e siguiente papelnan na un di nos balinan di informashon:

• e formulario "Petishon pa kambia lugá di instalashon" (ku ta optenibel na tur nos ofisinanan di servisio) kompletamente yená i firmá;
• un skèts di instalashon (ku ta un plan di e tereno riba kua tin indiká unda e instalashon ta situá aktualmente i unda bo ke laga pon'é).
  

Promé nos mester inspekshoná e instalashon eléktriko. Si resultá ku no ta posibel sin mas kambi'é di lugá, DOW mester kùr e instalashon promé, den presensia di Aqualectra. E or'ei bo ta risibí di nos un karta ku e petishon pa pèrkurá pa un keuringskaart..


Deskonektá bo awa i elektrisidat
Ora un hende ta bai muda, e mester laga deskonektá e konekshon eksistente di awa i elektrisidat.
Den nos foyeto riba deskonekshon ta pará loke bo mester hasi pa laga deskonektá e konekshon ku ta na bo nòmber.

Si bo ta bai muda pa un otro kas na Kòrsou, nos ta rekomendá bo pa entregá un petishon pa e adrès nobo promé ku bo entregá e petishon na Aqualectra pa deskonektá e konekshon na bo adrès bieu. Asina bo ta evitá ku bo ta haña bo sin awa i koriente den bo kas aktual i esun anterior.
Si bo tin pregunta riba bo petishon pa un konekshon di awa i elektrisidat nobo o eksistente, òf riba bo petishon pa laga deskonektá bo konekshon, bo por drenta den kontakto ku nos departamento Tékniko-Komersial durante ora di ofisina na number di telefòn 463-2274 i  463-2305.

Pa mas informashon check e foyeto deskonekshon di awa i elektrisidat.

Den ki kaso nos ta deskonektá?
Pa evitá deskonekshon, bo mester paga bo saldo pendiente promé ku e fecha menshoná riba bo kuenta. Si despues di e fecha di pago menshoná riba bo kuenta bo no a paga e suma, bo no ta kumpliendo ku bo obligashon i, sin notifikashon èkstra, nos por para suministro di awa i elektrisidat. Asina nos ta kumpli ku artíkulo 21, insiso 6, di e Kondishonnan general pa entrega di awa di bebe i energia eléktriko, ku Kompania di Produkshon i Distribushon di Awa i Elektrisidat di Korsow NV a stipulá.

Un kontratista, ku ta traha riba enkargo di Aqualectra, efektivamente ta deskonektá i rekonektá bo awa i elektrisidat. E kontratista ta identifiká su mes ku un identifikashon di Aqualectra, pa despues deskonektá i seya bo instalashon. E kontratista lo laga un karchi di deskonekshon atras, riba kua entre otro ta pará kuantu bo debe nos (inklusive gastu pa yega na bo kas). Ora bo bin paga e saldo pendiente na nos ofisinanan di servisio, bo mester bini ku e karchi di deskonekshon.

Ora bo paga e debe atrasá den su totalidat, nos ta bolbe konektá bo lo mas pronto posibel na e ret di awa i elektrisidat. Bo por paga bo saldo pendiente na nos ofisinanan di servisio na Sta. Rosa, Sta. Maria, Barber i Rif. Na nos ofisina di servisio na Otrobanda nos kahanan ta keda habrí te mas lat: di djaluna te ku djabièrnè di 8:00 - 18:00. Gastu di rekonekshon ta pa bo kuenta. Aqualectra no ta responsabel pa eventual daño ku ta konsekuensia di e deskonekshon.

Si bo bin paga riba e dia ku a deskonektá bo, e chèns ta grandi ku ta rekonektá bo mes dia. Aqualectra ta rekonektá atardi i anochi, di 16:00 or te 22:00 or. Informashon
Pa informashon tokante deskonekshon, bo por drenta den kontakto ku nos na telefòn number 463-2328 i 463-2329 durante ora di ofisina.

Foyetonan
Download e fFoyeto riba petishon pa un konekshon nobo di awa i elektrisidat.

Download e foyeto riba petishon pa un konekshon eksistente.

Download e foyeto riba deskonekshon di konekshon di awa i elektrisidat.