Interupshon debi na mantenshon
INTERUPSHON DEBI NA MANTENSHON
Pa por sigui garantisá ku por konfia suministro di koriente i awa di kalidat na Kòrsou, diariamente AQUALECTRA ta hasi trabou di mantenshon.
Mantenshon regular: elektrisidat
Mantenshon di e ret di elektrisidat ta rekerí remplaso i ahuste periódiko di ekipo i parti di e ret. Pa nos trahadónan por hasi trabou di mantenshon di forma safe, nos mester kita koriente bario pa bario. Nos ta plania trabounan di mantenshon pa minimalisá interupshon di suministro di elektrisidat na nos klientenan. Tur aña ta hasi mantenshon regular na 500 supstashon, loke ta eksihí un siklo di tres aña pa por kompletá e mantenshon regular planeá di tur e 1400 stashonnan.
Mantenshon regular: awa
Nos masterplan pa awa ta inkluí planifikashon na plaso largu i upgrading anualmente. Mantenshon di e ret di distribushon di awa ta konsistí mayormente di remplaso di pipa di awa.
Pa nos trahadónan por hasi trabou di mantenshon di forma safe, nos mester deskonektá e konekshon bario pa bario. Nos ta plania trabounan di mantenshon pa minimalisá interupshon di suministro di awa na nos klientenan.
Informashon na kliente tokante interupshon ku ta spera
Komo ta mantené e retnan regularmente segun nos plan di mantenshon, nos por informá nos klientenan sea personalmente, sea via medionan di komunikashon ki ora e interupshon lo tuma lugá i pa kuantu tempu nos ta spera ku lo e dura.
Nos ta hasi uso di diferente medio pa anunsiá na klientenan e ora ku nos ta spera un interupshon kòrtiku di suministro di awa o koriente.
En prinsipio tur siman riba djaweps i djabièrnè ta anunsiá e mantenshon regular pa medio di aviso den kuater korant. Nos Departamento di Relashonnan Públiko ta pone empresanan grandi di antemano via telefòn na altura di interupshon planeá di suministro di awa o elektrisidat.
Pa kualke pregunta tokante interupshon den suministro di awa o elektrisidat debí na mantenshon regular, fabor yama nos Departamento di Relashonnan Públiko na 462-5968.