INTERUPSHON DI AWA

Interupshon di awa
Nos meta ta suministrá awa di kalidat i na tur momento. Nos ta hasi nos máksimo esfuerso pa minimalisá interupshon den suministro di awa, evitá awa brùin i evitá fluktuashon den preshon di awa.


Awa brùin
Awa por sali ku un koló brùin ora tin tera, frus o kalki den e awa. Ora tin trabou na e ret, nos kambia preshon den e ret òf kambia direkshon den kua e awa ta kore, e awa por sali brùin. Si nos tim di trouble-shooting (“Storingsdienst”) determiná ku e awa brùin ta relashoná ku un problema temporal, nos por disidí di spula o laba e tuberia, kita e kranchi i e meter, pa laga e awa kore libremente pa un tempu limitá. Si e problema ta struktural, lo proponé un plan di remplaso/rekonstrukshon. Si tin awa brùin ta sali di un kranchi, ta rekomendabel pa klientenan usa aparatonan doméstiko (mashin di laba paña, mashin di laba tayó, bòiler, ducha, whirlpool, jacuzzi, etc.) solamente ora ta nesesario. Si usa awa brùin ora ta laba paña, esei por pone e pañanan kambia koló, sin ku un kliente kisas ke esei.


Preshon di awa muchu abou o muchu haltu
Preshon abou di awa por ta ku tin lekkage den e pipa mayó di AQUALECTRA, tin opstrukshon den e ret di distribushon, mal funshonamentu di pòmp òf mal funshonamentu di e meter di awa. Preshon haltu di awa por ta debí na sirkunstanshanan di altura: kasnan ta haña awa via tuberia ku ta suministrá awa na tur kliente, tambe na esnan ku ta biba na un punto mas haltu. Den kaso di problema di preshon di awa abou òf haltu, lo inspekshoná e meter i e pipanan na un kas. Si no por resolvé e problema inmediatamente, AQUALECTRA lo hasi esfuerso pa entregá awa via un otro ret.


No tin awa
Si di repente bo no ta haña awa na kas, esei por ta debí na e echo ku e tuberia ta ferstòp òf ku un pòmp di AQUALECTRA a kai afó. AQUALECTRA ta investigá unda e fayo ta i kiko a kous’é. Ora ta trata di problema struktural, AQUALECTRA ta hasi un investigashon profundo di tuberia den e bario. Si ta nesesario lo proponé plannan di rekonstrukshon pa remediá e situashon.


Konsumo eksesivo di awa
Un lekkage den pipanan na bo kas, tanki di w.c. ku ta sigui kore òf preshon di awa muchu haltu por ta kousa di pèrdida di gran kantidat di awa. Asina bo ripará konsumo eksesivo, ineksplikabel di awa, yama nos na 463-2328 òf 463-2329, òf akudí na un di nos sentronan di servisio. Nos Departamento Tékniko lo start un investigashon pa determiná e kousa. Nos lo tuma kontakto proaktivamente ku bo, na momento ku nos ripará konsumo muchu haltu di awa serka bo. Un empleado di AQUALECTRA lo bishitá bo pa investigá e kousa i rekomendá solushon. Abo komo kliente ta responsabel pa bo pipanan for di e meter te den bo kas; AQUALECTRA su responsabilidat ta terminá na e meter. P’esei, por fabor, tene bo pipanan den bon kondishon, pa evitá lekkage i pèrdida di awa.