KONEKTÁ I DESKONEKTÁ BO ELEKTRISIDAT

Suich prinsipal (Hoofdschakelaar)
Pèrkurá pa bo sa unda bo fiusbòks prinsipal ta situá, di moda ku, den kaso di emergensia, bo por kita koriente di henter bo edifisio rápidamente.

Fius

• Pèrkurá pa bo sa unda bo fiusbòks òf bo kashi di fius prinsipal ta situá.
• Pèrkurá pa bo sa fius di kuantu ampèr bo ta usa i pèrkurá pa bo tin un par di reserva. Mester remplasá fius ku a bula, no drecha e fius. No remplasá un fius pa unu di mas ampèr.
• Si un fius bula, deskonektá o paga e aparato ku por a kousa e problema.
• Pone bo hoofdschakelaar (suich prinsipal) na OFF, promé ku bo remplasá un fius.

Fius outomátiko

• Pèrkurá pa bo sa kon resèt un fius outomátiko. Despues ku paga o deskonektá un aparato di e sirkuito, pusha boton di e suich firmemente pa posishon OFF, despues pon’é bèk na ON. Si motibu di e fayo ta solushoná, bo tin koriente atrobe.
• Si bo fius outomátiko ta keda paga tras di otro, por tin un problema ku e ekipo, esta e aparato- o aparatonan riba e sirkuito. Si deskonektá e ekipo, e aparatonan, pero e fius outomátiko sigui ta paga, yama un elèktrishèn.