HOME Notisia di empresa Aqualectra i Selikor ta firma akuerdo pa desaroyá un planta di kima shushi

Aqualectra i Selikor ta firma akuerdo pa desaroyá un planta di kima shushi

Djaweps 20 di ougùstùs, den sala di ouditorio di Selikor NV, Aqualectra huntu ku Selikor a firma un akuerdo pa desaroyá, konstruí i ópera un planta di kima shushi ku e meta pa produsí energia.

Kòrsou konosé pa años kaba  fasilidatnan mínimo pa prosesá di sushi p’esei pa algun aña kaba ta buskando alternativanan pa prosesá e sushi Aktualmente Selikor ta prosesá gran parti  di e sushi na Malpais  i ta risaikel un parti di dje.

Direktor di Selikor, sr. Wesley Kook, durante e enkuentro ku prensa a splika e motibunan prinsipal dikon ta nesesario pa yega na un sistema moderno pa atendé ku shushi. E problemátika di shushi ta kresiendo mas i mas den nos komunidat i mester bini ku alternativa i métodonan nobo pa deshasí di shushi.  Komo e kompania di maneho di shushi di Kòrsou, Selikor ta sigui teknologianan inovativo hopi di aserka pa por garantisá un maneho responsabel i kontribuí na un medioambiente duradero.  Teniendo kuenta ku e kantidat di shushi ku tur dia Selikor ta registrá na landfill Malpais ta imperativo pa for di awor tuma e medidanan nesesario pa alargá bida di nos landfill.

Di su banda direktor di Aqualectra, sr. Anthon Casperson, a trese dilanti ku pa Aqualectra un alternativa interesante pa prosesá sushi ta pa kima e sushi. Kimamentu di sushi ta pone ku ta bin energia liber ku por usa pa produsí stom o gas ku por usa pa generá elektrisidat. E generamentu di elektrisidat aki ta hasi ta hasi e asuntu mas interesante pa Aqualectra kuminsá un koperashon ku Selikor pa studia e posibilidatnan pa realisá un instalashon ku por kima sushi ku ta produsí elektrisidat . Un instalashon asina yama “Waste to Energy Plant”( WTEP). Esaki sigur lo kontribuí ku suministro di energia
riba nos isla por ta ménos dependiente di kombustibel ku tambe ta forma  parti di Plan 2030.
Lo por produsí un mínimo di 7MW te un máksimo di 18 MW ku e WTEP aki ku ta ekivalente na 7 pa 18 % di e uso aktual di elektrisidat riba nos isla.

Presente na e enkuentro ku prensa tabata tei tambe diputado enkargá ku tur dos kompania di gobièrnu tambe a mustra riba e importansia pa trese alternativa ku por ta benefisioso pa komunidat.

Meta dje MOU ta pa un koperashon entre Aqualectra i Selikor pa realisá un instalashon pa kima sushi (WTEP ) ku tambe lo por  generá elektrisidat i kon ta bai hasi esaki lo keda definí den un dokumentu ku lo hasi un estudio kompleto dje trayekto.
Na final di e trayekto lo ta konosí e lokalidat kaminda e planta di kima shushi pa produsí energia lo ta situá, e teknologia ku lo bai apliká, e struktura legal, fiskal, operashonal i finansiero, e tarifanan, i e plan di komunikashon ku lo mester bai karga e proyekto aki. Ta spera ku e planta pro ta kla pa ópera na 2014.

Ku e inisiativa aki e dos kompanianan di gobièrnu ta demostrá un biaha mas ku ora pone man huntu, logronan grandi lo keda realisá.  Esaki ta un paso mas den direkshon pa yega na un medioambiente mas sano i duradero i realisá un produkshon di energia mas limpi i ekonómiko.