SEGURIDAT PADEN

Pa usa koriente mas safe posibel na kas òf ofisina: sigui e check-list akí di seguridat paden:

Pone tapa di seguridat di plèstik na tur stòpkòntakt ku no ta den uso. Esaki ta prevení ku mucha ta hinka algu den e stòpkòntakt.
No kita nunka e di tres pia for di un stèker di tres pia. E di tres pia ta e ground. Si bo no tin stòpkòntakt di tres buraku, kumpra adapter na hardware o negoshi di material i artíkulo eléktriko di kas.
Drecha òf remplasá waya di koriente dañá òf ku a bira bròs: nan por kousa kortsluiting, duna shòk òf kousa kandela. Chèk si tur waya di aparatonan eléktriko ta den bon kondishon.
Usa “ground fault circuit interrupters (GFCI)” (aardlekschakelaar, un tipo spesial di fius) pa protehé bo kontra shòk. E fiusnan spesial akí ta detektá fayo eléktriko i ta kita e koriente ku ta bai e stòpkòntakt i asina evitá kualke problema, por ehèmpel shòk. Nan ta spesialmente importante den kushina, baño i otro lugánan kaminda tin awa.
Usa waya di koriente manera debe ser. Pa evitá daño, ora di saka e aparato for di koriente, no ranka na e waya, sino tene e stèker i sak’é for di e stòpkòntakt. No pega un waya nunka ku klabu òf nit na nada, esei por bora e isolashon di e waya. Evitá kènk den e waya, no dobl’é, ni traha kònòpi aden ni trapa riba dje.
Resèt òf remplasá di un manera safe, kualke fius ku a bula.

No laga awa ku koriente tin kontakto ku otro. Awa ta kondusí elektrisidat i uso robes di elektrisidat kaminda tin awa por kousa daño serio i hasta morto. Sigui semper na tur momento e siguiente reglanan:

Tene awa leu for di koriente i aparato eléktriko.
No usa nunka aparato eléktriko bou di ducha ni den tobo di baña (badkuip).
No usa nunka aparato eléktriko ora bo ta pará den awa.
Pèrkurá pa bo man semper ta seku ora bo ta usa aparato eléktriko.