HOME Tep di seguridat pa aparatonan elektroniko

TEP DI SEGURIDAT PA APARATONAN ELÉKTRIKO


AQUALECTRA no ta responsabel pa daño ku aparatonan sufri promé ku tempu. Ke men, promé ku bo kumpra aparato eléktriko nobo:

  • Pèrkurá pa e voltahe ta korespondé ku e spesifikashonnan eléktriko ku ta usa na Kòrsou: 127/220 vòlt AC 50Hz, 3 fase i un ground). Si un aparato ta indiká: 100-240V, 50/60 Hz, e por traha rònt mundu. Si voltahe di un aparato ta diferente di e spesifikashonnan eléktriko ku ta usa na Kòrsou, bo mester usa un transformator òf “converter” pa kombertí e elektrisidat di 220/240 Vòlt AC pa 110/120 Vòlt AC (step down) òf 110/120 Vòlt AC pa 220/240 Vòlt AC (step up).
  • Kontrolá e frekuensia, esta e kantidat di saikel (Hertz): Motor eléktriko den aparato manera frishidèr, stòfzùiger, mashin di laba paña i otro aparatonan eléktriko ta sensitivo pa e kantidat di saikel (Hertz). Diferensha di frekuensia ke men ku un motor ta funshoná na un velosidat robes, loke ta kousa mas pèrdida di energia i mas kalor i konsekuentemente e aparato lo por traha pa ménos tempu.
  • Revisá e prekoushonnan di seguridat pa usa e aparato.
  • Kontrolá e labelnan di energia: aparato ku ta konsumí energia efisientemente ta indiká kuantu energia i plaka e ta spar.
  • Un fayo eléktriko den un aparato eléktriko o den un instalashon eléktriko, kombiná ku daño na e ground, por pone ku koriente por pasa via un pipa di awa. Instalashon inkorekto di waya o wayá dañá por krea e riesgo ku un persona ku ke bai kita, drecha òf instalá pipa di awa òf meter di awa òf hasi otro trabou di paipfeter, ta haña un shòk eléktriko. Den tal kaso, buska un elèktrishèn rekonosé pa solushoná e problema.
  • Evitá di sobrekargá un stòpkòntakt o sirkuito eléktriko. Ora un waya sobrekargá keinta di mas, e por pega na kandela.
  • No kòrta nunka e di tres pia di un stèker di tres pia, pa asina e stèker fit den un stòpkòntakt di dos buraku. Si bo hasi esei, e aparato no tin ground mas. Si un waya di un aparato ku koriente ariba hasi kontakto ku kurpa di e aparato, e konsekuensia por ta mortal. Si mester usa un stòpkòntakt di dos buraku, por instalá un adapter ku di un banda tin dos pia i e otro banda tres buraku, ku e waya di ground pegá na skruf di ground di tapa di e stòpkòntakt.


Seguridat di transformator

  • Transformator ta konsumí koriente. Hasta ora e aparato na kua e ta konektá no ta den uso, e transformator ta gasta koriente i asina e ta produsí kalor. Saka e transformator for di koriente, ora no ta us’é.
  • Ora bo ta konektá e transformator, no kita e waya di ground ku ta bai e aparato.
  • No traha ku un transformator ku tin koriente ariba, ora bo man o pia ta muhá.
  • Pèrkurá pa e transformator ta trahá pa mas Watt ku e kantidat di Watt di e aparato, sino e transformator por keinta di mas i hasta pega na kandela. Ekspertonan ta konsehá pa e transformator tin por lo ménos 10% mas Watt ku e aparato.
  • Promé ku bo bai kumpra un transformator, wak e number di "input" di bo aparato eléktriko. Generalmente e number di “input” ta pará riba stèker di e aparato o den e manual di e aparato. Si e aparato no tin e kantidat di Watt indiká, bo mes por kalkulá esei multiplikando e kantidat di vòlt ku e kantidat di ampèr. E resultado (VA) ta mas o ménos igual na e kantidat di Watt.