TEP GENERAL DI SEGURIDAT

Lesa e siguiente tepnan di seguridat i kompartí nan ku bo famia i amigunan.

No mishi nunka ku un waya di koriente, ni ora e ta na suela. Tene kuenta ku hasta waya ku ta bentá na suela por tin koriente ariba. Si bo mira un waya di koriente bentá na suela i bo tin miedu ku tin koriente ariba, yama inmediatamente AQUALECTRA su servisio ku ta 24 ora na warda na telefòn number 0800-0135.
Si bo ta biba den un bario ku kabel di elektrisidat bou di tera, buska drechi unda e kabelnan ta kore, promé ku bo kuminsá koba. Yama 463-2309 òf download e folder di Trabou di Kobamentu pa informashon importante.
Remplasá o drecha aparatonan eléktriko ku a kibra o ku tin waya ku a daña òf material di isolashon ku ta dañá. Aparatonan eléktriko òf waya kibrá o dañá por dal bo un shòk teribel ora bo mishi k nan. Mira nos artíkulo riba Seguridat Paden pa mas tep.
Pèrkurá pa bo kashi prinsipal di fius i kualke stashon di transformator (propiedat di AQUALECTRA) na tur momento ta aksesibel. Nos empleadonan mester por yega na e aparatonan rápido i sin peliger, pa hasi nan trabou. Esei sigur ta e kaso na ora di emergensia. No trata abo mes di drecha ningun propiedat di AQUALECTRA.
Mester laga instalashonnan ku AQUALECTRA a seya, keda seyá. E instalashonnan seyá ta garantisá bo seguridat i integridat di bo instalashon.
Promé ku bo laga empleado di kompanianan di utilidat drenta bo kas o negoshi, pidi nan mustra bo nan Tarheta di Identifikashon komo Empleado, pa komprobá nan identidat. Na tur momento empleadonan di AQUALECTRA mester tin ku nan Tarheta di Identifikashon ku nan pòrtrèt ariba.
Servisio ku AQUALECTRA duna na un kaso di emergensia ta grátis. Si AQUALECTRA mester bini bo kas o negoshi i resultá ku e fayo ta na bo instalashon, AQUALECTRA lo por kobra pa su servisio. Den e kaso ei loke AQUALECTRA kobra lo aparesé komo un gastu adishonal riba bo kuenta.
NO TA PÈRMITÍ NINGUN EMPLEADO DI AQUALECTRA RISIBÍ PAGO PA NINGUN SERVISIO KU NAN DUNA.

Si bo mira hende ta hòrta awa o waya di koper ku ta propiedat di AQUALECTRA, fabor yama 0800-0135 (grátis). Ta usa waya di koper pa ground e transformatornan ku ta te ariba na palu di lus (e wayanan di koper ta kondusí ekseso di voltahe pa tera). Si kita e waya di ground, esei ta kousa peliger na e kasnan konektá na e transformator en kuestion i konsekuentemente e personanan den e kasnan por haña shòk eléktriko i aparatonan por daña.