TRABOU DI KOBAMENTU

Pa vários motibu i diferente instansha i persona ta hasi trabou di kobamentu. Regularmente sa sosodé ku durante e trabounan akí kabel o pipa di Aqualectra ta sufri daño. Esei por okashoná interupshon di suministro di awa o elektrisidat serka posiblemente gran kantidat di konsumidó i ta kousa no solamente iritashon i molèster serka konsumidónan, sino tambe gastu innesesario pa drecha e kabel o pipa. P'esei ta mashá importante pa, promé ku kuminsá ku trabou di kobamentu, hasi tur loke ta posibel pa prevení daño na kabel o pipa.

Spesial pa esnan ku ke hasi trabou di kobamentu Aqualectra a traha un foyeto den kua tin e normanan ofisial di Aqualectra pa kobamentu den serkania di pipa i kabel.

Den e foyeto akí ta deskribí tambe loke Aqualectra por ofresé bo den kaso ku bo ke koba. Aqualectra ta disponé di planonan detayá di tur su kabelnan di distribushon i pipanan. Kontra pago por haña na Aqualectra tur e planonan ku bo mester. Ademas nos por marka tambe pa e kliente unda e kabel- i/o pipanan ta kore. Si un kliente no topa ku e kabel- i/o pipanan na e lugá indiká pa Aqualectra, por laga nos ekspertonan di e ret di kabel i pipa, pa nan lokalisá e kabel- i/o pipanan en kuestion. Aqualectra tin un tarifa pa ora ku e ta kobra pa e trabounan akí.

Unda bo por aplika?
Pa informashon di Aqualectra tokante trabou di kobamentu i petishon di plano òf otro servisionan tokante kobamentu por yama nos departamento di Registro di Medionan di Distribushon na telefòn 463-2309.
E departamento akí ta na e edifisio di Aqualectra na Maduro Plaza (Dokweg).

Klek aki pa download e foyekto tokante trabou di kobamentu.